معوكس
يقول لي صاحبي متى يجيك يامعوكس بقس مثل بقس اسامة المولد لطارق كيال عشان يدير رقبتك ويغير ملامحك ويشوه وجهك نرتاح منك ومن ظهورك ككاتب زاوية بعدما صرت تزعجنا كل يوم جمعة بمحاصرتك للقراء و"تطنزّك" على عباد الله، واقول لهذا الصاحب "الشراني" اللي يحتاج الى لجنة انضباط مضبوطة ماهي منفلتة ولاتستخدم على طاولة اجتماعاتها عبارة "اعزم الله" ترانا في الاعلام لدينا نظام وقانون.. (صحيح انهم مايبتون على طول ويحتاجون شوي سرعة) - معليش لاتفهمني ياساهر خطأ - قصدي يعجلون البت فيها ومع هذا اللي يخرج عن النص مايلوم إلا نفسه، اما عندنا في الرياضة فالله يخلف على الجميع (ماتدري انت بيد من؟)، يمكن يقول اللاعب للحكم احتسب "بنلتي" ويقول (سم عسى ماتسم) ويمكن يطلب احتساب هدف تسلل وطرد احد لاعبي الخصم ويقول (ابشر طال عمرك).. لا ويمكن الحكم ما يعجبه فريق ويحسب عليه بلنتي بآخر الدقايق عشان يخسر ومباراة نهائي كأس فيصل للشباب ما ابطت عشان ننسى كيف حول الحكم الكأس من الهلال لهجر ببلنتي "اختراع".
مع الاسف صارت الدعوى فوضى كأنها "مهاوش طلاب" في الفسحة ولا أحد يفرقهم .. ويمكن المظلوم في الرياضة مدان بعدما "يفحط" كم يوم بين لجنة ولجنة مثل بعض اللاعبين المحترفين اللي يطالبون بحقوقهم المالية وآخرتها يقولون لهم (طع شوري ..تنازل احسن لك والا بتشوف شيء ما شفته).
الآن بديت اصدق حكمة رفيق دربي "صياد" اللي مطلعها (الكورة مدورة) وصديقي عبدالسلام الهليل اللي تقول (راحوا الطيبين) وراحت معهم العلوم الحلوة للرياضة والسوالف الزينة للكورة، راحوا اللي مايرضون الخطأ ويتصدون بكل حزم لتجاوزات لاعب مفلوت واداري مصرقع جاء بالواسطة ومدرب (ضربت فيوزه) بعدالخسارة وعضو شرف طفران يبي يشخص قدام ام العيال بالتلفزيون واعلامي ماعنده الا سؤال (كيف رأيتم المباراة.. ويسأل الرئيس عن الفوز ويقول أكيد مبسوط).. ليه شايفه زعلان.. أكيد مبسوط؟.
ختاما ما اقول إلا الحمد لله ان بيتي في العريجاء وجدة تبعد اكثر من 1000كم وإلا كان "بقس المولد" هالحين في جبهتي كأنه جدار صادمه مفحط، والسيارة ايجاروالمرور مادرى عنه والدوريات ماجابوا خبر.. ثم عاد دوروا معوكس ومن يرد حقه الضائع.
موضوع: «رياضة بقسني» 
السبت نوفمبر 17, 2012 7:41 pm
